جی مکران

جی مکران 

عبدالحکیم ملازهی(لاشاری) 
بیا اِت حقیقیں همبلان
لب شکّرین وش زیملان
پرتوکلیں صاحبدلان
گون تاجءُ میری طُرّهان
جی عاقلین دانشوران
ملکءِ یلیں سلطانپران
زحم باز ءُ مِنّوکین نران
گوشوں به دار اِت نگدهان

...

جی مکران
بیا اِت حقیقیں همبلان
لب شکّرین وش زیملان
پرتوکلیں صاحبدلان
گون تاجءُ میری طُرّهان
جی عاقلین دانشوران
ملکءِ یلیں سلطانپران
زحم باز ءُ مِنّوکین نران
گوشوں به دار اِت نگدهان
مُلکءِ ملوکین نامدار
یک ساهتے دلگوش به دار
گیمرتگیں زردءِ توار
مرچی کناں نوکیں بیان
من پر بلوچستان گلیں
نالاں چو مرگے بلبلیں
ارسوں ماں چمّ اَنت گلگلیں
گه گوارگ اَنت چو ترونگلاں
هنچو که بلبل پر گُلءَ
عاشق پر آ گل شَکّلءَ
ناچی په سوتءُ زیملءَ
من پرگیابیں مکران
بلبل گلءِ عشقءَ زر ایت
مجنون په لیلی تلوس ایت
سسی په پُنّو ءَ مر ایت
من هم په لاشارءِ دران
هنچو مرید پر هانُکءَ
عزّت په ماهیں میرکءَ
شهداد په نازین مهنکءَ
من هم په کیچءِ آپسراں
هنچو که فرهادءِ نرءَ
عاشق به بیتیں یکبرءَ
شیرینءِ نازهکیں سرءَ
من هم په سربازءِ شمان
محمود سلطان مرد ورءَ
اودءَ ماں غزنینءِ درءَ
چون بوت ایازءِ هاترءَ
من هم په جالقءِ کهچران
هنچو که شاهءِ ذوالفقار
اسلامءِ واستءَ بے کرار
بیتگ مدام در گیر ءُ دار
من هم په تیسءِ گلگاں
هنچو که کمبر زحم جنین
دوداءُ بالاچ مرد ورین
هوت همّل اَت پرتوکلیں
من هم په دشتءِ روهوان
چو دادشاه پرغیرتءَ
گیشتر په ننگءُ کنتءَ
ڈکّ لگّ اِتگ گون دولتءَ
من هم په بنتءِ نیلّگاں
گوهرام گون مردی بیڑگءَ
کولءُ کرارءِ دارگءَ
پرمیزریں گناوگءَ
جزم اَت گون سانڈی گُرّگاں
لاشارءُ چانپءُ آهران
گون دل پسندین ساکران
کهدیمءُ زیدءُ کهچران
پهر اَنت په گنجین مکّران
پنوچ ءُ دلگانءِ کشار
گون شوهرانی گیرءُ دار
گون انت لطیفین چم حمار
زندءِ تمامیں جاوران
بمپور ءُ پهره پره گورین
گون عالمان نام آورین
سانڈین سران دانشورین
وش اَنت ماں پیشی بارهان
واشءُ گیابین زاهدان
کوهءَ بگر دان که لدان
کنڈورءُ ڈورءُ ملپدان
سبزءُ چراگ اَنت هر زمان
مسکین سراوانءِ گدار
گرد اَنت کبیهیں سرمچار
بر لیکهءَ دار اَنت میار
بکش اَنت وتی هیسی سران
سربازءِ دلبودین دمگ
گون گورمءُ بگّءُ رمگ
گجگیں کشاران ئی چمگ
نامی زران اِنت هرکران
آ نیبگءُ وشیّں هنار
زیتون ءُ موزءِ کشتزار
انبان ئی هپت رنگیں نگار
اومان کنت دل هر دمان
راسک مئے هزار گنجین وطن
جی بات تئی دشتءُ دمن
تئی باگءُ باگاتءُ چمن
مسکیں گدارءُ کهچران
ایر اَنت تئی بیهی نشان
برزین بگابندءِ دران
گواتکشّءِ سارتین سرزهان
کوهنین گدارءُ کُه گوران
باگیں قصرقندءِ بگان
گون کهنءُ آپءُ نیبگاں
میتاپءُ بستءُ کیلّگاں
گون بیٹءُ مسکیں کهچران
نیکشهرءِ نیکیں سروران
دانشورءُ سانڈین سران
مهمان نوازین مهتران
هست انت وتی ملکءِ گمان
بنتءُ توتانءُ مهمدان
تاں کاروانءُ کبله هاں
باگین جگینءِ مهتران
گردءُ کبیهں سروران
آ بَلّکءُ دشتءُ نگور
آ کیر ءُ بیرءُ سنٹءِ سر
پرماشءُ ماشءِ پلءُ بر
داں باهوءِ چتریں چشاں
جی مکّراں باگیچهیں
ماتیں وطن بے گچهیں
تئی مولماں سائیچهیں
پلگور بنت ماں هر کران
جی مئے گلیں ڈیهءُ ڈگار
سبز آورین کشتءُ کشار
جی بات تئی نامءُ توار
باتۓ نمیران درجهان
سرحد بگر دان زرگورءَ
سیبی بگر دان گوادرءَ
هزدار دان رودبارءِ درءَ
من گام په گام تئی ندربان
تو مئے تلاهین مادرۓ
مئے زیدءُ مسکیں کهچرۓ
لاهوتءِ پاکیں گوهرۓ
من تئے سرءَ کولیگ بان
هنچو که هنبوئیں بهار
هنچو که نوگجگیں چنار
هنچو که بانوریں هنار
باتۓ مدامءَ گنگُلاں
دنیاءِ چهرءُ گردشان
گون تو مدت بات جلءُ شان
گوار اِت مدام تئی هلکوان
اللهءِ گنجین رحمتان
من مکرانون سوال کتگ
کئے چو ترا برا بدحال کتگ
تئی شوکت ئی پامال کتگ
شیرینءُ شهدین جاوران
جی سربلندین مکران
کربان په تئی دشتءُ دران
تئی بَندراتءُ مرکبان
جی مکران جی بات ترا
تئی میزرءُ مسکین درءَ
گنجین تیابءُ ساوڑءَ
گون دل مه چنڈین جاشوان
تو همّلءِ سبزین زرۓ
گوهرامءِ برزین خیبرۓ
میرانءِ مهرین سنگرۓ
پیش دار هما هان ئی نشان
تو زحم جنانۓ بُندرۓ
سانڈان ئی کوهنین دپترۓ
شیران ئی هنکینءُ درۓ
کو اَنت تئی رزمی جوان
 دوستی منءَ جوابے به دۓ
یا وشیں مستاگے به دئے
یا گمزویں حالے به دئے
بلّے تئی هم درد باں
ماتین وطن جواب داتگاں
گندۓ که چو لیمرتگان
کم زانگءُ جورین بدان
بدواهءُ بدین همساهگے
ٹکّءُ درین بد واهگے
نے که درچکے ساهگے
یکے به ساسار ایت دمان
بدواه په چے چوش کنۓ
قهرءِ شراب نوش کنۓ
حقّءَ پراموش کنۓ
روک کنۓ موجین دلان
بدواه دلءَ بیدار به کن
وابءَ دمانے سار به کن
هیلاں بدیناں گار به کن
زیر شیر مردۓ توکلان
تو مکّرانءِ پُسگ ۓ
میرین بلوچءِ واهگ ۓ
بار اِت ماں چَکّ بنت گران
مرچی حکیم اومان کتگ
زپتین زهیراں هار کتگ
بے پردگ ئی کوکار کتگ
من پر بلوچان زران

http://baluchestan.persianblog.ir/post/57/