هانءُ سردار

هانءُ سردار  

میر احمد دهانی

مروچی جاهلءُ بے المیں اچ کئی مهربانی
اچ همے سردارءُ هانءُ زالمانی
اشاں هون چوشّ اِتگ ما بزّگانی
سراسر دژمن اَنت مئے ساهءُ جانی
 نه دیستگ وژدلی ما ماں جوانی

ما دیمپاں بوتگیں هرمشکلانی
شپانک ما بوتگیں میشءُ بزانی
مدام دیمپان ، جنگءُ سنگرانی
دهک ما پر کتگ ڈوکءُ ڈلانی
تگردءُ پات ءُ پیشّءُ ڈوبلانی
توامیں کوهءُ ڈنّءُ جنگلانی

انگت ای انت "ششک" زلمءِ نشانی
اگاں چنڈے ڈگار بوتگ ، یتیم چورهانی
په زورءُ تاکت ، بجّار بوتگ واجهانی
اگاں یک شوانگے بوتگ ماں کوهءَ چار بزانی
همک سال بزّگءَ داتگ گورانڈے کهچرانی
وتی بچ اش مدامی داتگ اَنت لنڈن روانی
بروت هاسل بکنت اِلمءُ شرّبوانی
اے توامیں هرچءُ درچ یونیورسٹیانی
اے جانءِ شیرگءُ هون بوتگ اَنت ما بزّگانی
مدام ایشاں کتگ کوشست گریبءِ چک موانی
گریبءِ چک به بیت دارچین ، چوپان بیت پسانی
گریبے گر به بیت هژّار باز دربارت باز بوانی
کےءَ گوں ، ما کنیں سرداریءُ هانی
بچ اگاں لوٹ ۓ تو شرّیں زندمانی
تهاری گار به بیت سیاهیں شپانی
بئیت اِنت رژنءُ پُلّیں ماهکانی
دلانءَ سارت کن اِت ماتءُ پتانی
دعا لوٹ اِیت چه الله ، میر دهانی
کبول بات اِنت دعا مئے بزّگانی
امیت واراں هداءِ رحمتانی
مه بات پیداگ پدءَ سرداریءُ هانی
میر احمد دهانی
http://baluchestan.persianblog.ir/post/59