دیدگانی مومیں دل / غنی پهوال

                   

او منی تَبد آزگیں تُنّءِ
زنزروکیں ارمانءُ واهگانی
نیلیں آزمانءَ        بے گُمانءَ
ازل چیریں اشرارانی تُلّیں ماه!!
خیال گوازیں کلکشانانی 1

نزاناں باریں      دگه جهانانی
هدا حجابیں بَرفانی پَردگاں آپیں
وتی سنجءُ سینگارءَ دَزگٹّ ۓ ؟؟

بے دَر وَرۓ تو بے مَٹ ۓ
                 زانت زیبائیءِ
هچ نزانت        سینگارءَ اَبید
هِچ نماریت عاشقانی     تلوسگاں ،زنزرگاں
    بے وسیں       مۓ دَر درّگاں
اُف منی هُدا !      چنچو بے حاجت اِنت
براهءِ کس مَلیکیں حیالانی
                  ٹهلیں مامیاتکی؟
آس دوزهیں تُنّ لاپیں دلانی
چمداریاں کهریں کریابیں دردانی
کِمار نه کنت ، بئے نه کنت

تُنّاپیں ارسانی سوزمانی سوزمان روکیں
هلاهوشیاں زِرتنگیں       مانیاریت
بچار ! چون نازانت ، چنچو مجازانت؟
هر چیزءَ وتی تبءَ چار ایت
نتر کتگ اَنت     زاناں
کوریں گُلّوپانی پیمءَ   
انگتءَ واب اَنت چَمّ      آگهیءِ
سَتَر بے حاجت اِنت     مرچی
کَهر گرنچیں زانت زیباهیءِ
بلے هو ،      کدکدی بیت؟
کئیت هما دلارامیں سبا
من پما روچاں زندگاں
تَب اِت مئیل کنت       جزماں روچے
ساچ بیت وهدے تئی آیگءِ موسم
تلاهیں مهکانءِ نود برمشیں
چاردهی نورانی زند پروریں 
شهماں گوں   سباه شپیں اُمیتءِ
سُتکگیں سرزمینءَ          مۓ جندءِ جبینءَ
په ٹهلءُ اداۓ دَرکپۓ
چو ترّیں بانورے ءَ سمبهین ۓ
په واهگی وتا       سرشَپءَ تاں هنّی ئیں بامءَ
لُنجیں سپاهیاں شَپانی ، کوریں دلانی
جاڈیت چراگانی تها
مان کَشّے مسکیں سریمگانی وڈا
کلکشاناں ڈکّمیں مهپرانی
ٹال ٹالءَ کَماۓ        په تهمبل ے
لَسّمیں گیوارءِ رهءَ ایرگیج ۓ
لَرزُکیں استاراں      سِپاهانی
بُرزءُ آبروئیں پونزءِ براه کنۓ
بامءِ استالءِ کیدءَ     جلکشیں
بَهتءِ پیشانیءِ اَبدی براهءِ
جَنّتیں جیگ بندءَ مُجّتی درنج ۓ
تنکّیں شینکاں زیرے     وتی
جارجَٹّیں گُشانءِ رنگءَ
نوک گنبدیں سینگءِ چو گوَنِکّءَ بُتکگیں
شهد شیریں زمباں ، جنّتی امباں
مانپوشۓ په سرءَ سرچادری
هُدا حجابیں برفانی پردگاں آپیں
اَزل چیریں اسرارانی تُلّسیں ماه !!
تَب اِت مئیل کنت          جزماں روچے
وهدے ساچ بیت تئی آیگءِ موسم
بلے پدا هم ترساں    چه دلءَ پرساں
چو مه بیت زند ساچیں گور امبازءِ نورانی
چاردهی پهاراں تئی
منی کرن کرنانی ودارءِ
پیریں دیدگانی     مومیں دل
آپ به بیتءُ به رچیت
آپ به بیتءُ به رچیتhttp://baluchestan.persianblog.ir/post/73