گورناک

 

گورناک

( پٹے ارس گورناک ءِ لپاشتگیں کَلگ ءِ نام ءَ )
سالاں جَکِت ئے ماں گوات و لوڑ
             سالاں کوه بُناں تو داشتگ اَت 
                               نهال جَتَگ
سالاں گئوش و « گونو»انی شاهدی تئے
گوریچ ساه سوچیں سَد شُتَگ چه تئی گوئرا
آهاڑ ؛  هزار لوار

هزار ایلگرانی سوبناک بیتگ ئے !
« گورناک » زندگ ئے
جاتیگ ءِ هُپ و گوات
             تئی دیم ءِ براه ءَ گار کتگ .
دست ءِ دِرنهاں به زور
           دست ءِ درنهاں به تِنگ
                      مردانی همت اِت پدا کلات بنت
آپتاپ و ماه ءِ روژنایی ءَ 
              باندات تئی په شادهاں توار کناں ...
گورناک !
بمبانی ساه سوچیں کَڈ و کَل ءَ چو مچار
گورناک !
ٹِینکاں و هستی سوچیں آسن و تَلار
                     شیطان و مهدی ءِ گوں لشکر انت هوار
تو دل ءَ بدار !
          اے ژَند و ژَکلی چه بنت بے توار
آپتاپ انت تئی دِرتگیں  ٹپ و کَڈ ءِ لیسگ په دوا
                   تَرهَؤر ءَ چه ؛ دیرگواز تریں زِراں
                                      ترا په کنت و بیت توار
گورناک چو مه گوار !
گورناک !
ملا کمال ءِ همت ءَ
            چو بلوچ ءِ مَچ ؛ سَؤل و کوه ءَ تو بچار
                     بُرز بُرز اِستال ءِ گوں هبر کن انت
گورناک !
جلات سَد شُتَگ چه تئی سرا ؛
               نه سوب بُرتگ اِش کدی ترا
سمین هزار کیت تئی په شادهاں
مَهکان ؛
                هزار تئی ندارگ ءَ په هست زروک
گورناک ! ...
        ارساں دل ءَ مه یار
            هوناں بس انت گیش و گیش تو مه گوار

                          ( ۲ )

گورناک !
زند ءِ ڈوبرانی ساه ءِ تنکی انت
            روچ ؛ چم ءِ برانزاں گار کتگ
« ملا کمال » 
            تئی سَؤل ؛ مَچ و کوه ءَ بُرز شُتگ
کوه بُن ءَ مَزار و « کَمبَر »ی توار ئی اِشکتگ
آپتاپ ءِ نیمگ ءَ شُتگ
رُژن و مهکان ءِ چمگانی بُرگ ءَ تاں بیت رَهبلد
جُواں به بنت رُژن ءَ پُر
« گورناک » زندگ انت !
                گورناک رُژن ءِ نشانی ءِ هدوک
بازیں بهار ءَ وشیانی شادهاں توار کنت
« ملا کمال »
            استاراں مردم ءِ مهمانی ءَ په گوانک جنت
« ملا کمال »
            آجویی ءِ برانز ءِ وشیں زیملانی شاده انت ...

                                           کریم بلوچ ـ تهل
                                                ماسکو

                                *‌‌  *  *